ਰੇਡ ਕ੍ਰਾਸ ਮਾਰਕੀਟ ਦੀ ਦੁਕਾਨ ਨੰਬਰ 11 ਮੁੜ ਖੋਲ੍ਹਣ ਦੀ ਤਿਆਰੀ!

ਰੇਡ ਕ੍ਰਾਸ ਅਤੇ ਡੀ.ਸੀ. ਦਫ਼ਤਰ ਦੀ ਕਥਿਤ ਮਿਲੀਭੁਗਤ ਦੇ ਦੋਸ਼, ਨਕਸ਼ਾ ਪਾਸ ਕਰਵਾਉਣ ਤੋਂ ਲੈ ਕੇ ਵਿਕਰੀ ਤੱਕ ਉੱਠੇ ਗੰਭੀਰ ਸਵਾਲ

ਕਪੂਰਥਲਾ 4 ਅਕਤੂਬਰ ਗੌਰਵ ਮੜੀਆ 

ਕਪੂਰਥਲਾ ਦੀ ਰੇਡ ਕ੍ਰਾਸ ਮਾਰਕੀਟ ਦੀ ਦੁਕਾਨ ਨੰਬਰ 11 ਨੂੰ ਮੁੜ ਖੋਲ੍ਹਣ ਦੀਆਂ ਤਿਆਰੀਆਂ ਕਥਿਤ ਤੌਰ ’ਤੇ ਜ਼ੋਰਾਂ ’ਤੇ ਹਨ। ਇਸ ਮਾਮਲੇ ਵਿੱਚ ਰੇਡ ਕ੍ਰਾਸ ਅਤੇ ਡੀ.ਸੀ. ਦਫ਼ਤਰ ਦੀ ਕਾਰਜਪ੍ਰਣਾਲੀ ਨੂੰ ਲੈ ਕੇ ਵੀ ਗੰਭੀਰ ਸਵਾਲ ਉੱਠ ਰਹੇ ਹਨ।

ਮਾਮਲੇ ਨਾਲ ਸਬੰਧਤ "ਹਿਊਮਨ ਰਾਈਟਸ ਪ੍ਰੈੱਸ ਕਲੱਬ (ਰਜਿ.) ਦੀ ਸ਼ਿਕਾਇਤ ਹੈ" ਸ਼ਿਕਾਇਤਕਰਤਾ ਵੱਲੋਂ ਦੋਸ਼ ਲਗਾਇਆ ਗਿਆ ਹੈ ਕਿ ਉਕਤ ਦੁਕਾਨ ਦਾ ਨਕਸ਼ਾ ਨਿਯਮਾਂ ਦੇ ਉਲਟ ਤਰੀਕੇ ਨਾਲ ਨਗਰ ਨਿਗਮ ਤੋਂ ਪਾਸ ਕਰਵਾਇਆ ਗਿਆ, ਜਿਸ ਸਬੰਧੀ ਕਥਿਤ ਤੌਰ ’ਤੇ ਦਸਤਾਵੇਜ਼ੀ ਸਬੂਤ ਵੀ ਸਬੰਧਤ ਅਧਿਕਾਰੀਆਂ ਨੂੰ ਮੁਹੱਈਆ ਕਰਵਾਏ ਜਾ ਚੁੱਕੇ ਹਨ।

ਹੈਰਾਨੀ ਦੀ ਗੱਲ ਇਹ ਦੱਸੀ ਜਾ ਰਹੀ ਹੈ ਕਿ ਸ਼ਿਕਾਇਤ ਕੀਤੇ ਜਾਣ ਦੇ ਬਾਵਜੂਦ ਦੁਕਾਨ ਦੀ ਵਿਕਰੀ ਹੋ ਗਈ ਅਤੇ ਹੁਣ ਇਸ ਨੂੰ ਕਿਸੇ ਹੋਰ ਵਿਅਕਤੀ ਦੇ ਨਾਮ ’ਤੇ ਕਰਕੇ ਮੁੜ ਖੋਲ੍ਹਣ ਦੀ ਕਵਾਇਦ ਚੱਲ ਰਹੀ ਹੈ। ਇਸ ਕਾਰਵਾਈ ਨੇ ਪ੍ਰਸ਼ਾਸਨਿਕ ਪੱਧਰ ’ਤੇ ਹੋਈ ਕਾਰਵਾਈ ਅਤੇ ਰੇਡ ਕ੍ਰਾਸ ਮਾਰਕੀਟ ਦੀਆਂ ਦੁਕਾਨਾਂ ਸਬੰਧੀ ਨਿਯਮਾਂ ਦੀ ਪਾਲਣਾ ਨੂੰ ਲੈ ਕੇ ਕਈ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।

ਸ਼ਿਕਾਇਤਾਂ ਅਤੇ ਸਬੂਤਾਂ ਦੇ ਬਾਵਜੂਦ ਕਾਰਵਾਈ ਕਿਉਂ ਨਹੀਂ?

ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ ਜੇਕਰ ਦੁਕਾਨ ਦੇ ਨਕਸ਼ੇ ਅਤੇ ਹੋਰ ਕਾਰਵਾਈ ਸਬੰਧੀ ਨਿਯਮਾਂ ਦੀ ਉਲੰਘਣਾ ਦੇ ਦਸਤਾਵੇਜ਼ੀ ਸਬੂਤ ਸਬੰਧਤ ਵਿਭਾਗਾਂ ਨੂੰ ਦਿੱਤੇ ਗਏ ਸਨ ਤਾਂ ਇਸ ’ਤੇ ਹੁਣ ਤੱਕ ਕੀ ਕਾਰਵਾਈ ਕੀਤੀ ਗਈ? ਜੇਕਰ ਦੁਕਾਨ ਦੀ ਵਿਕਰੀ ’ਤੇ ਕੋਈ ਇਤਰਾਜ਼ ਜਾਂ ਜਾਂਚ ਚੱਲ ਰਹੀ ਸੀ ਤਾਂ ਇਸ ਦੌਰਾਨ ਇਸ ਦੀ ਮਾਲਕੀ ਤਬਦੀਲੀ ਕਿਵੇਂ ਹੋਈ?

ਹੁਣ ਦੁਕਾਨ ਨੂੰ ਨਵੇਂ ਨਾਮ ’ਤੇ ਕਰਕੇ ਖੋਲ੍ਹਣ ਦੀ ਕਥਿਤ ਤਿਆਰੀ ਨੇ ਪੂਰੇ ਮਾਮਲੇ ਦੀ ਨਿਰਪੱਖ ਜਾਂਚ ਦੀ ਲੋੜ ਨੂੰ ਹੋਰ ਗੰਭੀਰ ਬਣਾ ਦਿੱਤਾ ਹੈ।

ਮਾਮਲੇ ਸਬੰਧੀ ਰੇਡ ਕ੍ਰਾਸ ਪ੍ਰਬੰਧਕਾਂ, ਡੀ.ਸੀ. ਦਫ਼ਤਰ ਅਤੇ ਨਗਰ ਨਿਗਮ ਦੇ ਸਬੰਧਤ ਅਧਿਕਾਰੀਆਂ ਦਾ ਪੱਖ ਲੈਣਾ ਵੀ ਜ਼ਰੂਰੀ ਹੈ, ਤਾਂ ਜੋ ਸਾਹਮਣੇ ਆ ਸਕੇ ਕਿ ਦੁਕਾਨ ਨੰਬਰ 11 ਦਾ ਨਕਸ਼ਾ ਕਿਹੜੇ ਨਿਯਮਾਂ ਅਤੇ ਕਿਸ ਮਨਜ਼ੂਰੀ ਤਹਿਤ ਪਾਸ ਕੀਤਾ ਗਿਆ ਅਤੇ ਸ਼ਿਕਾਇਤਾਂ ਦੇ ਬਾਵਜੂਦ ਮਾਲਕੀ ਤਬਦੀਲੀ ਦੀ ਪ੍ਰਕਿਰਿਆ ਕਿਵੇਂ ਅੱਗੇ ਵਧੀ।