ਪਾਕਿਸਤਾਨ ਕਰੇਗਾ ਸਿੱਖ ਯਾਤਰੀਆਂ ਦਾ ਖੁੱਲ੍ਹੇ ਦਿਲ ਨਾਲ ਸਵਾਗਤ

ਲਾਹੌਰ (ਅਲੀ ਇਮਰਾਨ ਚੱਠਾ)

 ਸ੍ਰੀ ਗੁਰੂ ਨਾਨਕ ਸਾਹਿਬ ਜੀ ਦੀ 556ਵੀਂ ਜਨਮ ਸ਼ਤਾਬਦੀ ਦੇ ਸੰਬੰਧ ਵਿੱਚ ਇਵੈਕਿਊਈ ਟਰੱਸਟ ਪ੍ਰਾਪਰਟੀ ਬੋਰਡ (ETPB) ਦੇ ਹੈੱਡ ਆਫਿਸ ਵਿਖੇ ਉੱਚ-ਪੱਧਰੀ ਮੀਟਿੰਗ ਹੋਈ। ਮੀਟਿੰਗ ਦੀ ਅਗਵਾਈ ਅਤਿਰਿਕਤ ਸਕੱਤਰ ਸ਼ਰਾਈਨ ਨਾਸਿਰ ਮੁਸ਼ਤਾਕ ਨੇ ਕੀਤੀ ਜਦਕਿ ETPB ਦੇ ਚੇਅਰਮੈਨ ਡਾ. ਸਾਜਿਦ ਮਹਮੂਦ ਚੌਹਾਨ ਵੀਡੀਓ ਲਿੰਕ ਰਾਹੀਂ ਸ਼ਾਮਲ ਹੋਏ।
 ਇਸ ਮੀਟਿੰਗ ਵਿੱਚ ਪੁਲਿਸ, ਰੇਂਜਰਜ਼, ਕਸਟਮ, ਇਮੀਗ੍ਰੇਸ਼ਨ, ਰੈਸਕਿਊ 1122, ਲੈਸਕੋ, ਸੂਈ ਗੈਸ, ਸਿਹਤ ਵਿਭਾਗ ਅਤੇ ਪ੍ਰਸ਼ਾਸਨਕ ਅਧਿਕਾਰੀ ਹਾਜ਼ਰ ਸਨ। ਮੀਟਿੰਗ ਦੌਰਾਨ ਯਾਤਰੀਆਂ ਦੇ ਆਉਣ, ਰਹਿਣ, ਭੋਜਨ, ਯਾਤਰਾ ਸਹੂਲਤਾਂ ਅਤੇ ਸੁਰੱਖਿਆ ਇੰਤਜ਼ਾਮਾਂ ਦੀ ਵਿਸਥਾਰ ਨਾਲ ਸਮੀਖਿਆ ਕੀਤੀ ਗਈ।
 ਡਾ. ਸਾਜਿਦ ਮਹਮੂਦ ਚੌਹਾਨ ਨੇ ਕਿਹਾ ਕਿ ਧਰਮ ਅਨੁਸਾਰ ਇਬਾਦਤ ਅਤੇ ਯਾਤਰਾ ਮਨੁੱਖੀ ਅਧਿਕਾਰਾਂ ਦਾ ਅਹਿਮ ਹਿੱਸਾ ਹੈ। ਉਨ੍ਹਾਂ ਉਮੀਦ ਜਤਾਈ ਕਿ ਵੱਧ ਤੋਂ ਵੱਧ ਭਾਰਤੀ ਸਿੱਖ ਯਾਤਰੀ ਇਸ ਵਾਰ ਗੁਰਪੁਰਬ ਵਿੱਚ ਹਿੱਸਾ ਲੈਣਗੇ। ਉਨ੍ਹਾਂ ਦੱਸਿਆ ਕਿ ਪਾਕਿਸਤਾਨ ਹਰ ਸਾਲ ਦੀ ਤਰ੍ਹਾਂ ਇਸ ਵਾਰ ਵੀ ਯਾਤਰੀਆਂ ਦਾ ਖੁੱਲ੍ਹੇ ਦਿਲ ਨਾਲ ਸਵਾਗਤ ਕਰੇਗਾ।
 ਅਤਿਰਿਕਤ ਸਕੱਤਰ ਨਾਸਿਰ ਮੁਸ਼ਤਾਕ ਨੇ ਦੱਸਿਆ ਕਿ ਯਾਤਰੀਆਂ ਲਈ ਏਅਰ ਕੰਡੀਸ਼ਨਡ ਬੱਸਾਂ, ਬਿਜਲੀ, ਸੂਈ ਗੈਸ ਦੀ ਨਿਰੰਤਰ ਸਪਲਾਈ ਅਤੇ ਡਾਕਟਰੀ ਸਹੂਲਤਾਂ ਮੁਹੱਈਆ ਕਰਵਾਈਆਂ ਜਾਣਗੀਆਂ। ਹਰ 20 ਬੱਸਾਂ ਨਾਲ ਰੈਸਕਿਊ 1122 ਦੀਆਂ ਦੋ ਐਮਬੂਲੈਂਸਾਂ ਲਾਜ਼ਮੀ ਤੌਰ ’ਤੇ ਹੋਣਗੀਆਂ। ਗੁਰਦੁਆਰਿਆਂ ਵਿਖੇ ਐਂਟੀ-ਡੇਂਗੂ ਸਪ੍ਰੇ ਅਤੇ ਸੁੰਦਰ ਰੌਸ਼ਨੀ ਨਾਲ ਸਜਾਵਟ ਕੀਤੀ ਜਾਵੇਗੀ।
 ਦੋ ਪੱਖੀ ਸਮਝੌਤੇ ਤਹਿਤ ਲਗਭਗ 3,000 ਭਾਰਤੀ ਸਿੱਖ ਯਾਤਰੀ ਇਸ ਵਾਰ ਪਾਕਿਸਤਾਨ ਆਉਣ ਦੀ ਉਮੀਦ ਹੈ। ਯਾਤਰੀ 4 ਨਵੰਬਰ ਨੂੰ ਵਾਘਾ ਬਾਰਡਰ ਰਾਹੀਂ ਪਹੁੰਚਣਗੇ ਅਤੇ 5 ਨਵੰਬਰ ਨੂੰ ਨਨਕਾਣਾ ਸਾਹਿਬ ਵਿਖੇ ਗੁਰਦੁਆਰਾ ਜਨਮ ਅਸਥਾਨ ਵਿੱਚ ਕੇਂਦਰੀ ਸਮਾਗਮ ਹੋਵੇਗਾ।