ਪੰਜਾਬ ਸਰਕਾਰ ਦੇ ਕਫ਼ਾਇਤੀ ਕਦਮ, ਇੰਧਨ ਤੇ ਖਰਚਿਆਂ ‘ਚ ਵੱਡੀ ਕਟੌਤੀ

ਲਾਹੌਰ, 2 ਅਪ੍ਰੈਲ (ਨਜ਼ਰਾਨਾ ਟਾਈਮਜ਼):

ਕਫ਼ਾਇਤੀ ਕਦਮਾਂ ਬਾਰੇ ਮਾਨੀਟਰਿੰਗ ਕਮੇਟੀ ਦੀ ਦੂਜੀ ਮੀਟਿੰਗ ਅੱਜ ਫਾਇਨੈਂਸ ਵਿਭਾਗ ਵਿੱਚ ਸੂਬਾਈ ਵਿੱਤ ਮੰਤਰੀ ਮੀਆਂ ਮੁਜਤਬਾ ਸ਼ੁਜਾ-ਉਰ-ਰਹਮਾਨ ਦੀ ਅਗਵਾਈ ਹੇਠ ਹੋਈ। ਮੀਟਿੰਗ ਵਿੱਚ ਕਮਿਊਨੀਕੇਸ਼ਨ ਐਂਡ ਵਰਕਸ ਮੰਤਰੀ ਸੋਹੈਬ ਅਹਿਮਦ ਭਰਥ, ਸਿੰਚਾਈ ਮੰਤਰੀ ਮੁਹੰਮਦ ਕਾਜ਼ਿਮ ਪਿਰਜ਼ਾਦਾ ਅਤੇ ਹੋਰ ਉੱਚ ਅਧਿਕਾਰੀ ਸ਼ਾਮਲ ਸਨ।
ਸੈਕਟਰੀ I&C ਨੇ ਕਮੇਟੀ ਨੂੰ ਦੱਸਿਆ ਕਿ ਕਫ਼ਾਇਤੀ ਕਦਮਾਂ ‘ਤੇ ਚੰਗੀ ਤਰੱਕੀ ਹੋਈ ਹੈ। ਨੋਟੀਫਿਕੇਸ਼ਨ ਤੋਂ ਬਾਅਦ ਕੋਈ ਨਵੀਆਂ ਸਰਕਾਰੀ ਗੱਡੀਆਂ ਨਹੀਂ ਖਰੀਦੀਆਂ ਗਈਆਂ। ਸਰਕਾਰੀ ਦਫ਼ਤਰਾਂ ਵਿੱਚ ਇੰਧਨ ਖਰਚ 50% ਘਟਾਇਆ ਗਿਆ ਹੈ ਅਤੇ ਕੈਬਿਨਟ ਮੈਂਬਰਾਂ ਲਈ ਫਿਊਲ ਸਹੂਲਤ ਦੋ ਮਹੀਨੇ ਲਈ ਬੰਦ ਕਰ ਦਿੱਤੀ ਗਈ ਹੈ।
ਵਰਕ ਫ੍ਰਾਮ ਹੋਮ ਨੀਤੀ ਵੀ ਲਾਗੂ ਹੈ, ਜਿਸ ਤਹਿਤ 43% ਅਧਿਕਾਰੀ ਅਤੇ 49% ਕਰਮਚਾਰੀ ਘਰੋਂ ਕੰਮ ਕਰ ਰਹੇ ਹਨ। ਚਾਰ ਦਿਨ ਕੰਮ ਤੇ ਤਿੰਨ ਦਿਨ ਛੁੱਟੀ ਦੀ ਨੀਤੀ ਵੀ ਜਾਰੀ ਹੈ।
ਪਬਲਿਕ ਸੈਕਟਰ ਕੰਪਨੀਆਂ ਅਤੇ ਖੁਦਮੁਖਤਿਆਰ ਅਦਾਰਿਆਂ ਦੇ ਬੋਰਡ ਮੈਂਬਰਾਂ ਦੀ ਫੀਸ ਵੀ ਦੋ ਮਹੀਨੇ ਲਈ ਰੋਕ ਦਿੱਤੀ ਗਈ ਹੈ। ਪ੍ਰੋਟੋਕਾਲ ਗੱਡੀਆਂ ਦੀ ਵਰਤੋਂ ਵਿੱਚ ਵੱਡੀ ਕਮੀ ਕੀਤੀ ਗਈ ਹੈ।
ਵਿੱਤ ਮੰਤਰੀ ਨੇ ਕਿਹਾ ਕਿ ਆਰਥਿਕ ਹਾਲਾਤਾਂ ਵਿੱਚ ਕਫ਼ਾਇਤ ਬਹੁਤ ਜ਼ਰੂਰੀ ਹੈ ਅਤੇ ਲੋਕਾਂ ਨੂੰ ਵੀ ਇੰਧਨ ਬਚਤ ਲਈ ਸਚੇਤ ਕੀਤਾ ਜਾਵੇਗਾ।