ਹੁਸ਼ਿਆਰਪੁਰ-ਟਾਂਡਾ ਨਵੀਂ ਰੇਲਵੇ ਲਾਈਨ ਨੂੰ ਹਰੀ ਝੰਡੀ

ਚੱਕ ਰਾਜੂ ਸਿੰਘ, ਨੰਦਾਚੌਰ ਤੇ ਘੋੜਾ ਵਾਹਾ ਵਿਖੇ ਸਥਾਪਿਤ ਹੋਣਗੇ ਸਟੇਸ਼ਨ
ਡੀਪੀਆਰ ਤਿਆਰ, 987 ਕਰੋੜ ਹੋਣਗੇ ਖਰਚ
ਹੁਸ਼ਿਆਰਪੁਰ: ਪ੍ਰਿੰਸਜੀਤ ਸਿੰਘ 
 

ਹੁਸ਼ਿਆਰਪੁਰ ਤੋਂ ਟਾਂਡਾ ਉੜਮੁੜ ਵਿਚਕਾਰ ਸਿੱਧਾ ਰੇਲ ਸੰਪਰਕ ਜੋੜਨ ਦੀ ਦਿਸ਼ਾ ਵਿੱਚ ਇੱਕ ਵੱਡੀ ਸਫ਼ਲਤਾ ਮਿਲੀ ਹੈ। ਰੇਲਵੇ ਵਿਭਾਗ ਨੇ ਇਸ ਪ੍ਰਸਤਾਵਿਤ 41.16 ਕਿਲੋਮੀਟਰ ਲੰਬੇ ਰੇਲਵੇ ਟ੍ਰੈਕ ਦੀ ਡੀਪੀਆਰ (Detailed Project Report) ਤਿਆਰ ਕਰਕੇ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਅਗਲੀ ਕਾਰਵਾਈ ਲਈ ਭੇਜ ਦਿੱਤੀ ਹੈ। ਇਸ ਅਹਿਮ ਪ੍ਰੋਜੈਕਟ 'ਤੇ ਕੁੱਲ 987.11 ਕਰੋੜ ਰੁਪਏ ਦੀ ਲਾਗਤ ਆਉਣ ਦਾ ਅਨੁਮਾਨ ਹੈ।
 

​35 ਪਿੰਡਾਂ ਦੀ ਜ਼ਮੀਨ ਹੋਵੇਗੀ ਐਕੁਆਇਰ
 

​ਇਹ ਨਵਾਂ ਰੇਲਵੇ ਟ੍ਰੈਕ ਹੁਸ਼ਿਆਰਪੁਰ ਅਤੇ ਟਾਂਡਾ ਦੇ ਵਿਚਕਾਰ ਪੈਂਦੇ 35 ਪਿੰਡਾਂ ਵਿੱਚੋਂ ਗੁਜ਼ਰੇਗਾ। ਰਿਪੋਰਟ ਅਨੁਸਾਰ, ਇਸ ਕਾਰਜ ਲਈ ਕੁੱਲ 136.6646 ਹੈਕਟੇਅਰ ਜ਼ਮੀਨ ਦੀ ਲੋੜ ਪਵੇਗੀ, ਜਿਸ ਵਿੱਚ 130.69 ਹੈਕਟੇਅਰ ਨਿੱਜੀ ਅਤੇ ਲਗਭਗ 6 ਹੈਕਟੇਅਰ ਸਰਕਾਰੀ ਜ਼ਮੀਨ ਸ਼ਾਮਲ ਹੈ। ਪ੍ਰਮੁੱਖ ਪਿੰਡਾਂ ਵਿੱਚ ਸਿੰਗੜੀਵਾਲਾ, ਚੱਕ ਰਾਜੂ ਸਿੰਘ, ਨੰਦਾਚੌਰ, ਘੋੜੇਵਾਹਾ ਅਤੇ ਹੋਰ ਕਈ ਪਿੰਡ ਸ਼ਾਮਲ ਹਨ।
 

​3 ਨਵੇਂ ਸਟੇਸ਼ਨਾਂ ਦੀ ਤਜਵੀਜ਼
 

​ਯੋਜਨਾ ਮੁਤਾਬਕ ਇਸ ਰੂਟ 'ਤੇ ਤਿੰਨ ਨਵੇਂ ਰੇਲਵੇ ਸਟੇਸ਼ਨ ਬਣਾਏ ਜਾਣਗੇ:
​ਚੱਕ ਰਾਜੂ ਸਿੰਘ
​ਨੰਦਾਚੌਰ
​ਘੋੜੇਵਾਹਾ
ਇਹਨਾਂ ਸਟੇਸ਼ਨਾਂ ਦੇ ਬਣਨ ਨਾਲ ਇਲਾਕੇ ਦੇ ਪੇਂਡੂ ਖੇਤਰਾਂ ਨੂੰ ਸਿੱਧਾ ਰੇਲ ਸਫ਼ਰ ਦੀ ਸਹੂਲਤ ਮਿਲੇਗੀ।
 

​ਬਜਟ ਦਾ ਵੇਰਵਾ
 

​ਰੇਲਵੇ ਵੱਲੋਂ ਤਿਆਰ ਡੀਪੀਆਰ ਵਿੱਚ ਖਰਚੇ ਦਾ ਵਿਸਥਾਰਪੂਰਵਕ ਵੇਰਵਾ ਦਿੱਤਾ ਗਿਆ ਹੈ:
​ਸਿਵਲ ਕੰਮ: 755.56 ਕਰੋੜ ਰੁਪਏ
ਬਿਜਲੀਕਰਨ: 136.13 ਕਰੋੜ ਰੁਪਏ
​ਸਿਗਨਲ ਅਤੇ ਟੈਲੀਕਾਮ: 95.42 ਕਰੋੜ ਰੁਪਏ
 

​ਪ੍ਰਸ਼ਾਸਨਿਕ ਕਾਰਵਾਈ ਜਾਰੀ
 

​ਹੁਸ਼ਿਆਰਪੁਰ ਦੀ ਡੀਸੀ ਆਸ਼ਿਕਾ ਜੈਨ ਨੇ ਦੱਸਿਆ ਕਿ ਪ੍ਰਸ਼ਾਸਨ ਇਸ ਡੀਪੀਆਰ ਦੀ ਗੰਭੀਰਤਾ ਨਾਲ ਸਟੱਡੀ ਕਰ ਰਿਹਾ ਹੈ। ਜਲਦੀ ਹੀ ਜ਼ਮੀਨ ਦੀ ਉਪਲਬਧਤਾ ਅਤੇ ਹੋਰ ਤਕਨੀਕੀ ਪਹਿਲੂਆਂ ਨੂੰ ਧਿਆਨ ਵਿੱਚ ਰੱਖ ਕੇ ਫਿਜ਼ੀਬਿਲਿਟੀ ਰਿਪੋਰਟ ਰੇਲਵੇ ਨੂੰ ਭੇਜੀ ਜਾਵੇਗੀ। ਫਿਰੋਜ਼ਪੁਰ ਡਿਵੀਜ਼ਨ ਦੇ ਡੀਆਰਐਮ ਸੰਜੀਵ ਕੁਮਾਰ ਅਨੁਸਾਰ, ਇਸ ਰਿਪੋਰਟ ਤੋਂ ਬਾਅਦ ਲੋਕੇਸ਼ਨ ਸਰਵੇ ਹੋਵੇਗਾ, ਜਿਸ ਤੋਂ ਬਾਅਦ ਰੇਲਵੇ ਬੋਰਡ ਨਿਰਮਾਣ ਬਾਰੇ ਅੰਤਿਮ ਫੈਸਲਾ ਲਵੇਗਾ।