ਵੈਸਾਖੀ ਮੇਲੇ ਲਈ ਪੰਜਾਬ ਸਰਕਾਰ ਦੀਆਂ ਵੱਡੀਆਂ ਤਿਆਰੀਆਂ ਮੁਕੰਮਲ

ਲਾਹੌਰ (ਨਜ਼ਰਾਨਾ ਟਾਈਮਜ਼) ਅਲੀ ਇਮਰਾਨ ਚੱਠਾ
 ਵੈਸਾਖੀ ਮੇਲੇ ਅਤੇ ਖਾਲਸਾ ਜਨਮ ਦਿਨ ਦੀਆਂ ਤਿਆਰੀਆਂ ਸੰਬੰਧੀ ਪੰਜਾਬ ਗ੍ਰਹਿ ਵਿਭਾਗ ਵਿੱਚ ਇੱਕ ਉੱਚ ਪੱਧਰੀ ਪ੍ਰਸ਼ਾਸਕੀ ਮੀਟਿੰਗ ਹੋਈ। ਇਹ ਪ੍ਰੋਗਰਾਮ ਇਵੈਕਿਊਈ ਟਰਸਟ ਪ੍ਰਾਪਰਟੀ ਬੋਰਡ ਅਤੇ ਧਾਰਮਿਕ ਮਾਮਲੇ ਤੇ ਅੰਤਰਧਾਰਮਿਕ ਸਾਂਝ ਮੰਤਰਾਲੇ ਦੇ ਅਧੀਨ ਆਯੋਜਿਤ ਕੀਤਾ ਜਾ ਰਿਹਾ ਹੈ। ਮੀਟਿੰਗ ਵਿੱਚ ਸੂਬਾਈ ਮੰਤਰੀ ਖ਼ਵਾਜਾ ਸਲਮਾਨ ਰਫ਼ੀਕ ਅਤੇ ਪਾਕਿਸਤਾਨ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸਰਦਾਰ ਰਮੇਸ਼ ਸਿੰਘ ਅਰੋੜਾ ਨੇ ਸ਼ਿਰਕਤ ਕੀਤੀ।
ਮੀਟਿੰਗ ਦੌਰਾਨ ਇਵੈਕਿਊਈ ਟਰਸਟ ਪ੍ਰਾਪਰਟੀ ਬੋਰਡ ਦੇ ਐਡੀਸ਼ਨਲ ਸੈਕਟਰੀ ਸ਼੍ਰਾਈਨਜ਼ ਨਾਸਿਰ ਮੁਸ਼ਤਾਕ ਨੇ ਯਾਤਰੀਆਂ ਲਈ ਕੀਤੀਆਂ ਤਿਆਰੀਆਂ ਬਾਰੇ ਵਿਸਥਾਰ ਨਾਲ ਬ੍ਰੀਫਿੰਗ ਦਿੱਤੀ। ਇਸ ਮੌਕੇ ਪੰਜਾਬ ਗ੍ਰਹਿ ਵਿਭਾਗ ਦੇ ਸੈਕਟਰੀ ਡਾ. ਅਹਿਮਦ ਜਾਵੇਦ ਕਾਜ਼ੀ ਅਤੇ ਸਪੈਸ਼ਲ ਸੈਕਟਰੀ ਵੀ ਮੌਜੂਦ ਸਨ।
ਬ੍ਰੀਫਿੰਗ ਦੌਰਾਨ ਨਾਸਿਰ ਮੁਸ਼ਤਾਕ ਨੇ ਦੱਸਿਆ ਕਿ ਭਾਰਤ ਸਮੇਤ ਦੁਨੀਆ ਭਰ ਤੋਂ ਸਿੱਖ ਯਾਤਰੀ ਵੈਸਾਖੀ ਸਮਾਗਮਾਂ ਵਿੱਚ ਹਿੱਸਾ ਲੈਣਗੇ। ਸਮਝੌਤੇ ਅਨੁਸਾਰ 10 ਅਪ੍ਰੈਲ ਨੂੰ ਤਿੰਨ ਹਜ਼ਾਰ ਯਾਤਰੀ ਪਾਕਿਸਤਾਨ ਪਹੁੰਚਣਗੇ। ਮੁੱਖ ਸਮਾਗਮ 14 ਅਪ੍ਰੈਲ ਨੂੰ ਹਸਨ ਅਬਦਾਲ ਸਥਿਤ ਗੁਰਦੁਆਰਾ ਪੰਜਾ ਸਾਹਿਬ ਵਿੱਚ ਹੋਵੇਗਾ। ਯਾਤਰੀ ਨਨਕਾਣਾ ਸਾਹਿਬ, ਫ਼ਰੂਕਾਬਾਦ (ਸ਼ੇਖੂਪੁਰਾ), ਕਰਤਾਰਪੁਰ, ਐਮੀਨਾਬਾਦ ਅਤੇ ਲਾਹੌਰ ਸਮੇਤ ਵੱਖ-ਵੱਖ ਧਾਰਮਿਕ ਸਥਾਨਾਂ ਦੇ ਦਰਸ਼ਨ ਕਰਨਗੇ। ਯਾਤਰੀਆਂ ਲਈ ਪੂਰੀ ਸੁਰੱਖਿਆ, ਮਿਆਰੀ ਤਬੀਬੀ ਸਹੂਲਤਾਂ ਅਤੇ ਬਿਹਤਰੀਨ ਆਵਾਜਾਈ ਦਾ ਪ੍ਰਬੰਧ ਕੀਤਾ ਜਾਵੇਗਾ।
ਸਰਦਾਰ ਰਮੇਸ਼ ਸਿੰਘ ਅਰੋੜਾ ਨੇ ਕਿਹਾ ਕਿ ਸਾਰੀਆਂ ਸੰਸਥਾਵਾਂ ਆਪਸੀ ਸਹਿਯੋਗ ਨਾਲ ਵਧੀਆ ਟੀਮ ਵਰਕ ਦਾ ਪ੍ਰਦਰਸ਼ਨ ਕਰਨ ਤਾਂ ਜੋ ਦੁਨੀਆ ਸਾਹਮਣੇ ਪਾਕਿਸਤਾਨ ਦੀ ਸਕਾਰਾਤਮਕ ਤਸਵੀਰ ਪੇਸ਼ ਹੋ ਸਕੇ।
ਸੂਬਾਈ ਮੰਤਰੀ ਖ਼ਵਾਜਾ ਸਲਮਾਨ ਰਫ਼ੀਕ ਨੇ ਕਿਹਾ ਕਿ ਪੰਜਾਬ ਸਰਕਾਰ ਦੁਨੀਆ ਭਰ ਤੋਂ ਆਉਣ ਵਾਲੇ ਮਹਿਮਾਨਾਂ ਦੀ ਉਨ੍ਹਾਂ ਦੀਆਂ ਰਿਵਾਇਤਾਂ ਅਨੁਸਾਰ ਖਾਤਰਦਾਰੀ ਕਰੇਗੀ ਅਤੇ ਉਨ੍ਹਾਂ ਦੀ ਸੁਰੱਖਿਆ ਤੇ ਆਰਾਮਦਾਇਕ ਰਹਿਣ ਲਈ ਖ਼ਾਸ ਪ੍ਰਬੰਧ ਕੀਤੇ ਜਾ ਰਹੇ ਹਨ। ਉਨ੍ਹਾਂ ਨੇ ਸਾਰੇ ਵਾਹਨਾਂ ਲਈ ਫਿਟਨੈੱਸ ਸਰਟੀਫਿਕੇਟ ਲਾਜ਼ਮੀ ਕਰਨ ਦੇ ਨਾਲ ਨਾਲ ਵਾਧੂ ਬਾਥਰੂਮ, ਹੈਵੀ ਡਿਊਟੀ ਜਨਰੇਟਰ ਅਤੇ ਵਧੇਰੇ ਐਫ਼ਆਈਏ ਕਾਊਂਟਰ ਲਗਾਉਣ ਦੇ ਹੁਕਮ ਦਿੱਤੇ।
ਨਾਸਿਰ ਮੁਸ਼ਤਾਕ ਨੇ ਕਿਹਾ ਕਿ ਸਿੱਖ ਯਾਤਰੀਆਂ ਨੂੰ ਪਹਿਲਾਂ ਤੋਂ ਵੀ ਵੱਧ ਸਤਿਕਾਰ ਅਤੇ ਸਹੂਲਤਾਂ ਦਿੱਤੀਆਂ ਜਾਣਗੀਆਂ ਤਾਂ ਜੋ ਉਹ ਆਪਣੇ ਘਰ ਵਰਗਾ ਮਹਿਸੂਸ ਕਰਨ। ਉਨ੍ਹਾਂ ਨੇ ਕਿਹਾ ਕਿ ਧਰਮ ਦਾ ਸਤਿਕਾਰ ਅਤੇ ਮਹਿਮਾਨ ਨਵਾਜ਼ੀ ਸਾਡੀਆਂ ਰਿਵਾਇਤਾਂ ਹਨ। ਉਨ੍ਹਾਂ ਨੇ ਹੋਰ ਦੱਸਿਆ ਕਿ ਗੁਰਦੁਆਰਾ ਜਨਮ ਅਸਥਾਨ ਸਮੇਤ ਸਾਰੇ ਗੁਰਦੁਆਰਿਆਂ ਵਿੱਚ ਬਿਜਲੀ ਅਤੇ ਗੈਸ ਦੀ ਲਗਾਤਾਰ ਸਪਲਾਈ ਯਕੀਨੀ ਬਣਾਈ ਜਾਵੇਗੀ ਅਤੇ ਸੁਰੱਖਿਆ ਮਾਮਲੇ ਵਿੱਚ ਜ਼ੀਰੋ ਟਾਲਰੈਂਸ ਨੀਤੀ ਅਪਣਾਈ ਜਾਵੇਗੀ।
ਮੀਟਿੰਗ ਵਿੱਚ ਮਨੁੱਖੀ ਅਧਿਕਾਰ ਵਿਭਾਗ ਦੇ ਸੈਕਟਰੀ, ਐਡੀਸ਼ਨਲ ਆਈਜੀ ਆਪਰੇਸ਼ਨਜ਼ ਪੰਜਾਬ, ਐਡੀਸ਼ਨਲ ਸੈਕਟਰੀ ਅੰਦਰੂਨੀ ਸੁਰੱਖਿਆ ਅਤੇ ਸਿਹਤ, ਪੁਲਿਸ, ਟਰਾਂਸਪੋਰਟ, ਕਸਟਮ, ਐਫ਼ਆਈਏ, ਰੇਂਜਰਜ਼ ਅਤੇ ਮੋਟਰਵੇ ਪੁਲਿਸ ਸਮੇਤ ਹੋਰ ਸੰਬੰਧਿਤ ਵਿਭਾਗਾਂ ਦੇ ਨੁਮਾਇੰਦਿਆਂ ਨੇ ਭਾਗ ਲਿਆ। ਇਸ ਤੋਂ ਇਲਾਵਾ ਨਨਕਾਣਾ ਸਾਹਿਬ, ਨਰੋਵਾਲ, ਗੁਜਰਾਂਵਾਲਾ, ਹਸਨ ਅਬਦਾਲ ਆਦਿ ਜ਼ਿਲ੍ਹਿਆਂ ਦੇ ਕਮਿਸ਼ਨਰਾਂ, ਆਰਪੀਓਜ਼, ਡਿਪਟੀ ਕਮਿਸ਼ਨਰਾਂ ਅਤੇ ਡੀਪੀਓਜ਼ ਨੇ ਵੀ ਵੀਡੀਓ ਲਿੰਕ ਰਾਹੀਂ ਹਿੱਸਾ ਲਿਆ।