ਕਾਂਗਰਸ ਨੇ ਹਮੇਸ਼ਾ ਮਹਾਤਮਾ ਗਾਂਧੀ ਦੇ ਰਾਮ ਰਾਜ ਦੇ ਸੰਕਲਪ ਨੂੰ ਤਿਆਗ ਕੇ ਬਾਬਰ ਰਾਜ ਵਾਲੀ ਮਾਨਸਿਕਤਾ ਨੂੰ ਉਤਸ਼ਾਹਿਤ ਕੀਤਾ ਹੈ-ਰਾਕੇਸ਼ ਕੁਮਾਰ ਨੀਟੂ

ਬਾਬਰੀ ਬਾਰੇ ਸੋਨੀਆ ਗਾਂਧੀ ਦੀਆਂ ਟਿੱਪਣੀਆਂ ਤੇ ਸਿਆਸੀ ਹੰਗਾਮਾ;ਭਾਜਪਾ ਰਾਕੇਸ਼ ਕੁਮਾਰ ਨੀਟੂ ਨੇ ਦਿੱਤਾ ਕਰਾਰਾ ਜਵਾਬ

ਸੁਲਤਾਨਪੁਰ ਲੋਧੀ 11 ਨਵੰਬਰ ਗੌਰਵ ਮੜੀਆ 

ਕਾਂਗਰਸ ਸੰਸਦੀ ਦਲ ਦੀ ਮੁਖੀ ਸੋਨੀਆ ਗਾਂਧੀ ਵੱਲੋਂ ਬ੍ਰਿਟਿਸ਼ ਅਖਬਾਰ ਦ ਗਾਰਡੀਅਨ ਨੂੰ ਦਿੱਤੇ ਗਏ ਹਾਲ ਹੀ ਦੇ ਇੰਟਰਵਿਊ ਤੋਂ ਬਾਅਦ ਭਾਰਤੀ ਰਾਜਨੀਤੀ ਵਿੱਚ ਇੱਕ ਨਵਾਂ ਵਿਵਾਦ ਛਿੜ ਗਿਆ ਹੈ।ਇਸ ਇੰਟਰਵਿਊ ਵਿੱਚ ਸੋਨੀਆ ਗਾਂਧੀ ਨੇ ਯਾਦ ਕੀਤਾ ਕਿ 1992 ਵਿੱਚ ਟੈਲੀਵਿਜ਼ਨ ਤੇ ਅਯੁੱਧਿਆ ਵਿੱਚ ਬਾਬਰੀ ਮਸਜਿਦ ਨੂੰ ਢਾਹੁਣ ਤੋਂ ਬਾਅਦ ਉਨ੍ਹਾਂ ਦੀਆਂ ਅੱਖਾਂ ਵਿੱਚ ਹੰਝੂ ਸਨ।ਉਨ੍ਹਾਂ ਦੇ ਬਿਆਨ ਤੋਂ ਬਾਅਦ ਭਾਰਤੀ ਜਨਤਾ ਪਾਰਟੀ (ਭਾਜਪਾ)ਨੇ ਕਾਂਗਰਸ ਪਾਰਟੀ ਤੇ ਤਿੱਖਾ ਹਮਲਾ ਕੀਤਾ।ਭਾਜਪਾ ਹਲਕਾ ਇੰਚਾਰਜ ਸੁਲਤਾਨਪੁਰ ਲੋਧੀ ਰਾਕੇਸ਼ ਕੁਮਾਰ ਨੀਟੂ ਨੇ ਕਿਹਾ ਕਿ ਸੋਨੀਆ ਗਾਂਧੀ ਦੇ ਹੰਝੂ ਸਿਰਫ਼ ਗੜੀਆਲੀ ਅਤੇ ਮਗਰਮੱਛ ਦੇ ਹੰਝੂ ਸਨ।ਉਨ੍ਹਾਂ ਟਿੱਪਣੀ ਕੀਤੀ ਕਿ ਉਨ੍ਹਾਂ ਦੇ ਬਿਆਨ ਦਾ ਮਕਸਦ ਲੋਕਾਂ ਨੂੰ ਭੜਕਾਉਣਾ ਹੈ।ਉਨ੍ਹਾਂ ਅੱਗੇ ਦੋਸ਼ ਲਾਇਆ ਕਿ ਸੋਨੀਆ ਗਾਂਧੀ ਅਤੇ ਕਾਂਗਰਸ ਪਾਰਟੀ ਦੇ ਦਿਲਾਂ ਵਿੱਚ ਅੱਜ ਵੀ ਬਾਬਰ ਵੱਸਦਾ ਹੈ।ਉਨ੍ਹਾਂ ਦਾਅਵਾ ਕੀਤਾ ਕਿ ਸੋਨੀਆ ਗਾਂਧੀ ਵੋਟ-ਬੈਂਕ ਦੀ ਰਾਜਨੀਤੀ ਲਈ ਅਜਿਹੇ ਸੰਵੇਦਨਸ਼ੀਲ ਮੁੱਦੇ ਉਠਾਉਂਦੀ ਹੈ ਅਤੇ ਜ਼ੋਰ ਦੇ ਕੇ ਕਿਹਾ ਕਿ ਇਹ ਬਿਆਨ ਸਿਰਫ਼ ਘੱਟ ਗਿਣਤੀ ਭਾਈਚਾਰੇ ਨੂੰ ਲੁਭਾਉਣ ਲਈ ਦਿੱਤਾ ਗਿਆ ਸੀ।ਰਾਕੇਸ਼ ਕੁਮਾਰ ਨੀਟੂ ਨੇ ਇਹ ਸਵਾਲ ਵੀ ਉਠਾਇਆ ਕਿ 6 ਦਸੰਬਰ,1992 ਦੀ ਦੁਪਹਿਰ ਨੂੰ ਜਦੋਂ ਇਹ ਘਟਨਾ ਵਾਪਰ ਰਹੀ ਸੀ,ਤਾਂ ਉਹ ਕਿਸ ਟੀਵੀ ਚੈਨਲ ਤੇ ਇਸ ਦਾ ਸਿੱਧਾ ਪ੍ਰਸਾਰਣ (ਲਾਈਵ ਕਵਰੇਜ)ਦੇਖ ਰਹੇ ਸਨ,ਕਿਉਂਕਿ ਉਸ ਸਮੇਂ, ਅੱਜ ਦੇ ਮੁਕਾਬਲੇ, ਨਿੱਜੀ ਨਿਊਜ਼ ਚੈਨਲਾਂ ਦੁਆਰਾ ਕੋਈ ਲਾਈਵ ਕਵਰੇਜ ਨਹੀਂ ਕੀਤੀ ਜਾਂਦੀ ਸੀ।ਉਨ੍ਹਾਂ ਨੇ ਸੋਨੀਆ ਗਾਂਧੀ ਅਤੇ ਕਾਂਗਰਸ ਪਾਰਟੀ ਦੀ ਵਿਚਾਰਧਾਰਾ ਤੇ ਤਿੱਖਾ ਹਮਲਾ ਕੀਤਾ ਹੈ।ਉਨ੍ਹਾਂ ਦੋਸ਼ ਲਾਇਆ ਕਿ ਸੋਨੀਆ ਗਾਂਧੀ ਦਾ ਬਿਆਨ ਉਨ੍ਹਾਂ ਦੇ ਦੋਹਰੇ ਮਾਪਦੰਡਾਂ ਅਤੇ ਤੁਸ਼ਟੀਕਰਨ ਦੀ ਰਾਜਨੀਤੀ ਨੂੰ ਉਜਾਗਰ ਕਰਦਾ ਹੈ।ਉਨ੍ਹਾਂ ਕਿਹਾ ਕਿ ਬਾਬਰੀ ਮਸਜਿਦ ਲਈ ਹੰਝੂ ਵਹਾਉਣ ਵਾਲੇ ਅਤੇ ਬਟਲਾ ਹਾਊਸ ਮੁਕਾਬਲੇ ਦੇ ਦੋਸ਼ੀਆਂ ਨਾਲ ਹਮਦਰਦੀ ਰੱਖਣ ਵਾਲੇ ਨੇਤਾ ਆਪਣੇ ਆਪ ਨੂੰ ਭਗਵਾਨ ਰਾਮ ਦੇ ਆਦਰਸ਼ਾਂ ਦੇ ਵਿਰੁੱਧ ਅਤੇ ਇਤਿਹਾਸ ਦੇ ਹਮਲਾਵਰ ਪਾਤਰਾਂ ਦੇ ਸਮਰਥਕ ਵਜੋਂ ਸਥਾਪਿਤ ਕਰਦੇ ਹਨ।ਉਨ੍ਹਾਂ ਕਿਹਾ ਕਿ ਕਾਂਗਰਸ ਨੇ ਹਮੇਸ਼ਾ ਮਹਾਤਮਾ ਗਾਂਧੀ ਦੇ ਰਾਮ ਰਾਜ ਦੀ ਧਾਰਨਾ ਨੂੰ ਛੱਡ ਕੇ ਬਾਬਰ ਰਾਜ ਦੀ ਮਾਨਸਿਕਤਾ ਨੂੰ ਅੱਗੇ ਵਧਾਇਆ ਹੈ।ਰਾਕੇਸ਼ ਕੁਮਾਰ ਨੀਟੂ ਨੇ ਕਿਹਾ ਕਿ ਸੋਨੀਆ ਗਾਂਧੀ,ਤੁਹਾਡੇ ਪਰਿਵਾਰ ਦੀਆਂ ਤਿੰਨ ਪੀੜ੍ਹੀਆਂ ਨੇ ਬਿਨਾਂ ਸੱਦੇ ਦੇ ਬਾਬਰ ਦੀ ਕਬਰ ਤੇ ਜਾ ਕੇ ਮੱਥਾ ਟੇਕਿਆ ਹੈ।ਜਵਾਹਰ ਲਾਲ ਨਹਿਰੂ 1959 ਵਿੱਚ,ਇੰਦਰਾ ਗਾਂਧੀ 1968 ਵਿੱਚ ਅਤੇ ਰਾਹੁਲ ਗਾਂਧੀ 2005 ਵਿੱਚ ਮਨਮੋਹਨ ਸਿੰਘ ਦੇ ਨਾਲ ਉਨ੍ਹਾਂ ਦੀ ਕਬਰ ਤੇ ਗਏ ਸਨ।ਉਨ੍ਹਾਂ ਕਿਹਾ ਕਿ ਤੁਹਾਡੇ ਦਿਲ ਵਿੱਚ ਅਸਲ ਵਿੱਚ ਕੀ ਹੈ,ਹੁਣ ਉਹ ਸਾਹਮਣੇ ਆ ਗਿਆ ਹੈ।