ਤਰਸਿੱਕਾ ਬਚਾਓ ਮੋਰਚੇ ਦਾ ਤਾਕਤਵਰ ਟਰੈਕਟਰ ਮਾਰਚ: 12 ਸਤੰਬਰ ਨੂੰ, ਇਤਿਹਾਸ ਰਚਣ ਦੀ ਤਿਆਰੀ!

ਟਾਂਗਰਾ - ਸੁਰਜੀਤ ਸਿੰਘ ਖਾਲਸਾ 

 12 ਸਤੰਬਰ ਨੂੰ ਬਲਾਕ ਤਰਸਿੱਕਾ ਦੇ ਲੋਕ ਆਪਣੀ ਏਕਤਾ ਅਤੇ ਤਾਕਤ ਦਾ ਵੱਡਾ ਪ੍ਰਦਰਸ਼ਨ ਕਰਨ ਜਾ ਰਹੇ ਹਨ। ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਇਹ ਕੋਈ ਆਮ ਟਰੈਕਟਰ ਮਾਰਚ ਨਹੀਂ, ਸਗੋਂ ਆਪਣੀ ਪਹਿਚਾਣ ਨੂੰ ਬਚਾਉਣ ਲਈ ਇੱਕ ਇਤਿਹਾਸਕ ਲੜਾਈ ਹੈ। ਇਸ ਟਰੈਕਟਰ ਮਾਰਚ ਵਿੱਚ ਕਿਸਾਨ, ਕਾਮਰੇਡ, ਸਮਾਜ ਸੇਵੀ ਸੰਸਥਾਵਾਂ, ਰਾਜਨੀਤਿਕ ਪਾਰਟੀਆਂ, ਮੌਜੂਦਾ ਅਤੇ ਸਾਬਕਾ ਸਰਪੰਚ ਸਭ ਇੱਕੋ ਮੰਚ 'ਤੇ ਇਕੱਠੇ ਹੋ ਰਹੇ ਹਨ, ਜਿਸ ਨੇ ਪੂਰੇ ਇਲਾਕੇ ਵਿੱਚ ਜੋਸ਼ ਭਰ ਦਿੱਤਾ ਹੈ। ਬਲਾਕ ਤਰਸਿੱਕਾ ਬਚਾਓ ਮੋਰਚੇ ਦੇ ਆਗੂਆਂ ਨੇ ਜਾਰੀ ਸਾਂਝੇ ਬਿਆਨ ਵਿੱਚ ਕਿਹਾ ਕਿ ਇਸ ਮਾਰਚ ਵਿੱਚ ਹਰ ਪਿੰਡ ਤੋਂ ਵੱਡੀ ਗਿਣਤੀ ਵਿੱਚ ਟਰੈਕਟਰ ਸ਼ਾਮਲ ਹੋਣਗੇ। ਉਨ੍ਹਾਂ ਨੇ ਸਾਰੇ ਪਿੰਡਾਂ ਨੂੰ 12 ਸਤੰਬਰ ਦੀ ਸਵੇਰ 8 ਵਜੇ ਤੱਕ ਦਾਣਾ ਮੰਡੀ ਤਰਸਿੱਕਾ ਵਿਖੇ ਪਹੁੰਚਣ ਦੀ ਅਪੀਲ ਕੀਤੀ ਹੈ, ਤਾਂ ਜੋ ਇਹ ਪ੍ਰਦਰਸ਼ਨ ਸੱਚਮੁੱਚ ਯਾਦਗਾਰੀ ਬਣ ਸਕੇ। ਇਹ ਟਰੈਕਟਰ ਮਾਰਚ ਜੱਬੋਵਾਲ, ਰਾਏਪੁਰ, ਸਰਜਾ, ਬੇਰੀਆਣਾ , ਡੇਰੀਵਾਲ, ਭੱਟੀਕੇ, ਸੈਦਪੁਰ, ਮਹਿਸਮਪੁਰ, ਜਲਾਲ, ਕੁਹਾਟਵਿੰਡ ਅਤੇ ਨੰਗਲ ਤੋਂ ਹੁੰਦਾ ਹੋਇਆ ਮਹਿਤਾ ਵਿਖੇ ਸਮਾਪਤ ਹੋਵੇਗਾ। ਮੋਰਚੇ ਦੇ ਆਗੂਆਂ ਨੇ ਪਿਛਲੇ ਇਕੱਠ ਨੂੰ ਸਫਲ ਬਣਾਉਣ ਲਈ ਸਾਰੇ ਜਾਗਦੀਆਂ ਜ਼ਮੀਰਾਂ ਵਾਲੇ ਲੋਕਾਂ ਦਾ ਧੰਨਵਾਦ ਕੀਤਾ ਅਤੇ ਇਸ ਨਵੇਂ ਮਾਰਚ ਨੂੰ ਵੀ ਕਾਮਯਾਬ ਕਰਨ ਲਈ ਸਹਿਯੋਗ ਦੀ ਮੰਗ ਕੀਤੀ ਹੈ। ਇਸ ਮਾਰਚ ਨੂੰ ਲੈ ਕੇ ਲੋਕਾਂ ਵਿੱਚ ਭਾਰੀ ਉਤਸ਼ਾਹ ਹੈ। ਸਥਾਨਕ ਨਿਵਾਸੀਆਂ ਦਾ ਕਹਿਣਾ ਹੈ ਕਿ ਇਹ ਉਨ੍ਹਾਂ ਦੀ ਆਵਾਜ਼ ਨੂੰ ਪ੍ਰਸ਼ਾਸਨ ਤੱਕ ਪਹੁੰਚਾਉਣ ਦਾ ਇੱਕ ਤਾਕਤਵਰ ਤਰੀਕਾ ਹੈ ਅਤੇ ਉਹ ਪੂਰੀ ਤਰ੍ਹਾਂ ਇਸ ਮੋਰਚੇ ਦੇ ਨਾਲ ਖੜ੍ਹੇ ਹਨ। ਹੁਣ ਦੇਖਣਾ ਇਹ ਹੈ ਕਿ ਇਹ ਇਤਿਹਾਸਕ ਮਾਰਚ ਕੀ ਰੰਗ ਲਿਆਉਂਦਾ ਹੈ ਅਤੇ ਕੀ ਬਲਾਕ ਤਰਸਿੱਕਾ ਆਪਣੀ ਹੋਂਦ ਬਚਾਉਣ ਵਿੱਚ ਕਾਮਯਾਬ ਹੋ ਪਾਵੇਗਾ। ਇਹ ਬਿਆਨ ਜਾਰੀ ਕਰਨ ਵਾਲਿਆਂ ਵਿੱਚ ਸਰਗਰਮ ਆਗੂ ਮਨਦੀਪ ਸਿੰਘ ਧਰਦੇਉ , ਬਲਜੀਤ ਸਿੰਘ ਤਰਸਿੱਕਾ, ਮਨਜੀਤ ਸਿੰਘ ਸਾਬਕਾ ਚੇਅਰਮੈਨ , ਸ਼ਿਵਰਾਜ ਸਿੰਘ ਤਰਸਿੱਕਾ , ਬਲਜੀਤ ਸਿੰਘ ਤਰਸਿੱਕਾ , ਕੰਵਲਜੀਤ ਸਿੰਘ ਰਸੂਲਪੁਰ , ਪਲਵਿੰਦਰ ਸਿੰਘ ਖੁਜਾਲਾ ਬਲਾਕ ਪ੍ਰਧਾਨ , ਮਲਕੀਅਤ ਸਿੰਘ ਸਰਜਾ , ਸੋਭਾ ਸਿੰਘ ਭਿੰਡਰ , ਤਰਸੇਮ ਸਿੰਘ ਸੇਮਾ , ਹਰਜੀਤ ਸਿੰਘ ਆਦਿ ਹਾਜ਼ਰ ਸਨ