ਬਾਬਾ ਗੁਰੂ ਨਾਨਕ ਦੇਵ ਜੀ ਦੇ 556ਵੇਂ ਪ੍ਰਕਾਸ਼ ਪੁਰਬ ਸਮਾਰੋਹ ਨਨਕਾਣਾ ਸਾਹਿਬ ‘ਚ ਸ਼ੁਰੂ — ਭਾਰਤੀ ਸਿੱਖ ਯਾਤਰੀ ਕੱਲ੍ਹ ਵਾਘਾ ਬਾਰਡਰ ਰਾਹੀਂ ਪਾਕਿਸਤਾਨ ਪਹੁੰਚਣਗੇ

ਲਾਹੌਰ (ਨਜ਼ਰਾਨਾ ਟਾਈਮਜ਼) — 3 ਨਵੰਬਰ 2025
 

Evacuee Trust Property Board ਅਤੇ ਧਾਰਮਿਕ ਮਾਮਲੇ ਅਤੇ ਅੰਤਰਧਾਰਮਿਕ ਹਮ ਆਹੰਗੀ ਮੰਤਰਾਲਾ ਦੀ ਦੇਖਰੇਖ ਹੇਠ ਬਾਬਾ ਗੁਰੂ ਨਾਨਕ ਦੇਵ ਜੀ ਦੇ 556ਵੇਂ ਪ੍ਰਕਾਸ਼ ਗੁਰਪੁਰਬ ਦੇ ਸਮਾਰੋਹਾਂ ਦੀ ਸ਼ੁਰੂਆਤ ਗੁਰਦੁਆਰਾ ਜਨਮ ਅਸਥਾਨ ਨਨਕਾਣਾ ਸਾਹਿਬ ਵਿਖੇ ਹੋ ਗਈ ਹੈ।
ਸਮਾਰੋਹ ਦੀ ਸ਼ੁਰੂਆਤ ਅਖੰਡ ਪਾਠ ਸਾਹਿਬ ਨਾਲ ਹੋਈ, ਜਿਸ ਵਿੱਚ ਅਮਰੀਕਾ, ਕੈਨੇਡਾ, ਆਸਟ੍ਰੇਲੀਆ, ਯੂਰਪ ਅਤੇ ਪਾਕਿਸਤਾਨ ਭਰ ਤੋਂ ਬਹੁਤ ਵੱਡੀ ਗਿਣਤੀ ਵਿੱਚ ਸਿੱਖ ਸੰਗਤਾਂ ਨੇ ਸ਼ਿਰਕਤ ਕੀਤੀ।
ਅਧਿਕਾਰਕ ਤੌਰ ‘ਤੇ, ਭਾਰਤੀ ਸਿੱਖ ਯਾਤਰੀ 4 ਨਵੰਬਰ ਦੀ ਸਵੇਰ ਨੂੰ ਵਾਘਾ ਬਾਰਡਰ ਰਾਹੀਂ ਪਾਕਿਸਤਾਨ ਵਿੱਚ ਦਾਖ਼ਲ ਹੋਣਗੇ, ਜਿੱਥੇ ਉਨ੍ਹਾਂ ਦਾ ਗਰਮਜੋਸ਼ੀ ਨਾਲ ਸਵਾਗਤ ਕੀਤਾ ਜਾਵੇਗਾ। ਮੁੱਖ ਸਮਾਰੋਹ 5 ਨਵੰਬਰ ਨੂੰ ਗੁਰਦੁਆਰਾ ਜਨਮ ਅਸਥਾਨ, ਨਨਕਾਣਾ ਸਾਹਿਬ ਵਿੱਚ ਹੋਵੇਗਾ, ਜਿਸ ਦੇ ਮੁੱਖ ਮਹਿਮਾਨ ਧਾਰਮਿਕ ਮਾਮਲੇ ਮੰਤਰੀ ਸਰਦਾਰ ਮੁਹੰਮਦ ਯੂਸਫ਼ ਹੋਣਗੇ।

Evacuee Trust Property Board ਦੇ ਚੇਅਰਮੈਨ ਡਾ. ਸਾਜਿਦ ਮਹਮੂਦ ਚੌਹਾਨ ਨੇ ਗੁਰਦੁਆਰਾ ਜਨਮ ਅਸਥਾਨ ਨਨਕਾਣਾ ਸਾਹਿਬ ਦਾ ਅਚਾਨਕ ਦੌਰਾ ਕੀਤਾ ਤੇ ਸੁਰੱਖਿਆ ਪ੍ਰਬੰਧਾਂ, ਸਫਾਈ ਅਤੇ ਯਾਤਰੀਆਂ ਲਈ ਸਹੂਲਤਾਂ ਦਾ ਜਾਇਜ਼ਾ ਲਿਆ। ਉਨ੍ਹਾਂ ਨੇ ਰਿਹਾਇਸ਼ੀ ਬਲਾਕਾਂ, ਬਿਸਤਰੇ ਦੇ ਪ੍ਰਬੰਧ, ਸਾਫ਼ ਪੀਣ ਵਾਲੇ ਪਾਣੀ, ਅਤੇ ਲੰਗਰ ਹਾਲ ਦੀ ਵੀ ਜਾਂਚ ਕੀਤੀ।
ਇਸੇ ਦੌਰਾਨ, ਸ਼੍ਰਾਈਨਜ਼ ਦੇ ਐਡੀਸ਼ਨਲ ਸੈਕਟਰੀ ਨਾਸਿਰ ਮੁਸ਼ਤਾਕ, ਸੁਰੱਖਿਆ ਵਿੰਗ ਅਤੇ ਸ਼੍ਰਾਈਨਜ਼ ਟੀਮ ਸਮੇਤ ਵਾਘਾ ਬਾਰਡਰ ਗਏ, ਜਿੱਥੇ ਉਨ੍ਹਾਂ ਨੇ ਇਮੀਗ੍ਰੇਸ਼ਨ ਕਾਊਂਟਰਾਂ, ਸੁਰੱਖਿਆ ਸਕੈਨਰਾਂ, ਨਵਾਂ ID ਤਸਦੀਕ ਸਿਸਟਮ, ਖਾਣ-ਪੀਣ ਦੇ ਪ੍ਰਬੰਧ ਅਤੇ ਇੰਤਜ਼ਾਰ ਖੇਤਰਾਂ ਦਾ ਮੁਆਇਨਾ ਕੀਤਾ। ਉਨ੍ਹਾਂ ਨੇ ਸਟਾਫ਼ ਅਭਿਆਸ (rehearsal) ਵੀ ਕਰਵਾਈ।
ਐਡੀਸ਼ਨਲ ਸੈਕਟਰੀ ਨਾਸਿਰ ਮੁਸ਼ਤਾਕ ਨੇ ਕਿਹਾ ਕਿ ਹਰ ਸਾਲ ਦੀ ਤਰ੍ਹਾਂ, ਇਸ ਵਾਰ ਵੀ ਗੁਰੂ ਨਾਨਕ ਦੇਵ ਜੀ ਦਾ ਪ੍ਰਕਾਸ਼ ਪੁਰਬ ਪਾਕਿਸਤਾਨ ਭਰ ਵਿੱਚ ਪੂਰੇ ਸ਼ਰਧਾ ਤੇ ਜੋਸ਼ ਨਾਲ ਮਨਾਇਆ ਜਾ ਰਿਹਾ ਹੈ।
ਤਹਿ ਸ਼ਡਿਊਲ ਅਨੁਸਾਰ, ਭਾਰਤੀ ਸਿੱਖ ਯਾਤਰੀਆਂ ਦਾ 4 ਨਵੰਬਰ ਨੂੰ ਵਾਘਾ ਬਾਰਡਰ ‘ਤੇ ਚੇਅਰਮੈਨ ਡਾ. ਸਾਜਿਦ ਮਹਮੂਦ ਚੌਹਾਨ, ਐਡੀਸ਼ਨਲ ਸੈਕਟਰੀ ਨਾਸਿਰ ਮੁਸ਼ਤਾਕ, ਸਰਦਾਰ ਰਮੇਸ਼ ਸਿੰਘ ਅਰੋੜਾ ਅਤੇ ਹੋਰ ਅਧਿਕਾਰੀਆਂ ਵੱਲੋਂ ਸਵਾਗਤ ਕੀਤਾ ਜਾਵੇਗਾ।