ਲਾਹੌਰ ‘ਚ ਭਾਰਤੀ ਮਹਿਲਾ ਨੇ ਧਰਮ ਬਦਲ ਕੇ ਸਥਾਨਕ ਵਿਅਕਤੀ ਨਾਲ ਕੀਤਾ ਵਿਆਹ — ਵਕੀਲ ਨੇ ਕਿਹਾ “ਪੂਰੀ ਆਪਣੀ ਮਰਜ਼ੀ ਨਾਲ”

ਲਾਹੌਰ, ਪਾਕਿਸਤਾਨ ਨਜ਼ਰਾਨਾ ਟਾਈਮਜ਼ 15 ਨਵੰਬਰ ਅਲੀ ਇਮਰਾਨ ਚੱਠਾ
 

ਪਾਕਿਸਤਾਨ ਧਾਰਮਿਕ ਯਾਤਰਾ ਲਈ ਆਈ ਇਕ ਭਾਰਤੀ ਸਿੱਖ ਯਾਤਰੀ ਨੇ ਇਸਲਾਮ ਧਰਮ ਅਪਣਾਕੇ ਇਕ ਪਾਕਿਸਤਾਨੀ ਨਾਗਰਿਕ ਨਾਲ ਵਿਆਹ ਕਰ ਲਿਆ ਹੈ। ਲਾਹੌਰ ਦੇ ਇਕ ਵਕੀਲ ਮੁਤਾਬਕ, ਇਹ ਫੈਸਲਾ ਉਸ ਨੇ ਪੂਰੀ ਆਪਣੀ ਮਰਜ਼ੀ, ਸੁਤੰਤਰਤਾ ਤੇ ਬਿਨਾਂ ਕਿਸੇ ਦਬਾਅ ਦੇ ਲਿਆ।
ਸਰਬਜੀਤ ਕੌਰ, ਜਿਸ ਨੇ ਇਸਲਾਮ ਕਬੂਲ ਕਰਨ ਤੋਂ ਬਾਅਦ ਨਵਾਂ ਨਾਮ ‘ਨੂਰ’ ਰੱਖਿਆ, ਨੇ 5 ਨਵੰਬਰ ਨੂੰ ਫ਼ਰੂਕਾਬਾਦ ਦੇ ਰਹਿਣ ਵਾਲੇ ਨਾਸਿਰ ਹੁਸੈਨ ਨਾਲ ਨਿਕਾਹ ਕੀਤਾ। ਨਿਕਾਹ ਹਾਈ ਕੋਰਟ ਲਾਹੌਰ ਦੇ ਵਕੀਲ ਅਹਿਮਦ ਹਸਨ ਪਾਸ਼ਾ ਦੇ ਚੈਂਬਰ ‘ਚ ਹੋਇਆ।
 

ਪਾਸ਼ਾ ਨੇ ਦੱਸਿਆ ਕਿ ਪਰਿਵਰਤਨ ਅਤੇ ਨਿਕਾਹ ਦੀ ਪੂਰੀ ਵੀਡੀਓ ਰਿਕਾਰਡਿੰਗ ਮੌਜੂਦ ਹੈ। ਨੂਰ ਵੱਲੋਂ ਸਥਾਨਕ ਮੈਜਿਸਟਰੇਟ ਅੱਗੇ ਹਲਫ਼ਨਾਮਾ ਵੀ ਦਿੱਤਾ ਗਿਆ ਤੇ ਦਸਤਾਵੇਜ਼ ਨਿਆਇਕ ਮੈਜਿਸਟਰੇਟ ਮੁਹੰਮਦ ਖਾਲਿਦ ਵੜੈਚ ਨੂੰ ਜਮਾ ਕਰਵਾਏ ਗਏ।
ਵਕੀਲ ਨੇ ਕਿਹਾ ਕਿ ਵੀਜ਼ਾ ਤੇ ਇਮੀਗ੍ਰੇਸ਼ਨ ਦੇ ਮਾਮਲੇ ਵਿਦੇਸ਼ ਮਾਮਲੇ ਵਿਭਾਗ ਦੇ ਅਧੀਨ ਹੁੰਦੇ ਹਨ, ਜਦੋਂਕਿ ਉਨ੍ਹਾਂ ਦੀ ਜ਼ਿੰਮੇਵਾਰੀ ਸਿਰਫ਼ ਕਾਨੂੰਨੀ ਸੁਰੱਖਿਆ ਤੱਕ ਸੀਮਿਤ ਸੀ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਨਾਸਿਰ ਹੁਸੈਨ ਪਹਿਲਾਂ ਹੀ ਵਿਆਹਸ਼ੁਦਾ ਹੈ, ਤਿੰਨ ਬੱਚਿਆਂ ਦੇ ਪਿਤਾ ਹਨ ਅਤੇ ਦੋਵਾਂ ਵਿਚਕਾਰ ਸੋਸ਼ਲ ਮੀਡੀਆ ਰਾਹੀਂ ਪਹਿਲਾਂ ਤੋਂ ਸੰਪਰਕ ਸੀ।