ਬੇਅਦਬੀਆਂ ਪਿਛੇ ਸਿਖ ਵਿਰੋਧੀਆਂ ਦਾ ਮਨੋਰਥ ਤੇ ਸਾਜ਼ਿਸ਼ ਸਿਖ ਜਗਤ ਸਮਝੇ

ਮੀਡੀਆ ਦੀ ਖ਼ਬਰ ਨਾ ਬਣਾਉ ਬੇਅਦਬੀਆਂ ਨੂੰ 
ਜਥੇਦਾਰ ਅਕਾਲ ਤਖ਼ਤ ਨੁਮਾਇੰਦਾ ਇਕਠ ਸਦਣ
ਬਲਵਿੰਦਰ ਪਾਲ ਸਿੰਘ ਪ੍ਰੋਫੈਸਰ 
​ਮੁਹਾਲੀ ਵਿੱਚ ਗੁਟਕਾ ਸਾਹਿਬ ਦੀ ਬੇਅਦਬੀ ਦੀ ਤਾਜ਼ਾ ਘਟਨਾ ਨੇ ਇੱਕ ਵਾਰ ਫਿਰ ਸਿੱਖ ਹਿਰਦਿਆਂ ਨੂੰ ਵਲੂੰਧਰ ਕੇ ਰੱਖ ਦਿੱਤਾ ਹੈ। ਅਜਿਹੀਆਂ ਘਟਨਾਵਾਂ ਨਾ ਸਿਰਫ਼ ਧਾਰਮਿਕ ਆਸਥਾ 'ਤੇ ਸੱਟ ਮਾਰਦੀਆਂ ਹਨ, ਸਗੋਂ ਸਮਾਜਿਕ ਤਾਣੇ-ਬਾਣੇ ਨੂੰ ਉਲਝਾਉਣ ਦੀ ਇੱਕ ਡੂੰਘੀ ਸਾਜ਼ਿਸ਼ ਦਾ ਹਿੱਸਾ ਵੀ ਜਾਪਦੀਆਂ ਹਨ। ਪਰ ਅੱਜ ਸਵਾਲ ਇਹ ਪੈਦਾ ਹੁੰਦਾ ਹੈ ਕਿ ਕੀ ਸਾਡਾ ਪ੍ਰਤੀਕਰਮ ਅਤੇ ਮੀਡੀਆ ਦੀ ਕਵਰੇਜ ਅਣਜਾਣੇ ਵਿੱਚ ਉਹਨਾਂ ਸ਼ਰਾਰਤੀ ਅਨਸਰਾਂ ਦੇ ਮਨੋਰਥਾਂ ਨੂੰ ਹੀ ਤਾਂ ਪੂਰਾ ਨਹੀਂ ਕਰ ਰਹੀ?
ਬੇਅਦਬੀ ਕਰਨ ਵਾਲੇ ਅਪਰਾਧੀਆਂ ਦਾ ਮੁੱਖ ਮਕਸਦ ਸਿਰਫ਼ ਗੁਰਬਾਣੀ ਦੇ ਅੰਗਾਂ ਦੀ ਬੇਅਦਬੀ ਕਰਨਾ ਹੀ ਨਹੀਂ ਹੁੰਦਾ, ਸਗੋਂ ਸਿੱਖ ਕੌਮ ਨੂੰ ਮਾਨਸਿਕ ਅਤੇ ਜਜ਼ਬਾਤੀ ਤੌਰ 'ਤੇ ਅਸਥਿਰ ਕਰਨਾ ਹੁੰਦਾ ਹੈ। ਉਹ ਚਾਹੁੰਦੇ ਹਨ ਕਿ ਸਿੱਖ ਸੰਗਤ ​ਸੜਕਾਂ 'ਤੇ ਉਤਰ ਕੇ ਜਾਮ ਲਗਾਵੇ।​ਆਪਣੇ ਰੋਜ਼ਾਨਾ ਦੇ ਕੰਮਾਂ ਅਤੇ ਤਰੱਕੀ ਦੇ ਰਾਹ ਤੋਂ ਭਟਕ ਜਾਵੇ।ਗੁਰਬਾਣੀ ਦੇ ਫਲਸਫੇ ਨੂੰ ਜੀਵਨ ਵਿੱਚ ਕਮਾਉਣ ਦੀ ਬਜਾਏ, ਸਿਰਫ਼ ਵਿਰੋਧ ਪ੍ਰਦਰਸ਼ਨਾਂ ਤੱਕ ਸੀਮਤ ਹੋ ਕੇ ਰਹਿ ਜਾਵੇ।
​ਜਦੋਂ ਅਸੀਂ ਅਜਿਹੀਆਂ ਘਟਨਾਵਾਂ ਨੂੰ ਮੀਡੀਆ ਵਿੱਚ ਬਹੁਤ ਜ਼ਿਆਦਾ ਤਰਜੀਹ ਦਿੰਦੇ ਹਾਂ, ਤਾਂ ਅਸੀਂ ਅਣਜਾਣੇ ਵਿੱਚ ਉਸ ਨਕਾਰਾਤਮਕਤਾ ਦਾ ਪ੍ਰਚਾਰ ਕਰ ਰਹੇ ਹੁੰਦੇ ਹਾਂ ਜਿਸਨੂੰ ਦੁਸ਼ਮਣ ਫੈਲਾਉਣਾ ਚਾਹੁੰਦਾ ਹੈ। ਵਾਰ-ਵਾਰ 'ਬੇਅਦਬੀ' ਸ਼ਬਦ ਦੀ ਵਰਤੋਂ ਅਤੇ ਉਸਦੇ ਦ੍ਰਿਸ਼ ਦਿਖਾਉਣਾ ਕੌਮ ਦੇ ਅੰਦਰ ਇੱਕ ਨਿਰਾਸ਼ਾ ਅਤੇ ਗੁੱਸੇ ਦੀ ਲਹਿਰ ਪੈਦਾ ਕਰਦਾ ਹੈ। ਸਾਨੂੰ ਇਹ ਸਮਝਣਾ ਪਵੇਗਾ ਕਿ ਅਪਰਾਧੀ ਦਾ ਮਨੋਰਥ ਹੀ ਸਾਨੂੰ ਉਲਝਾਉਣਾ ਹੈ। ਜਦੋਂ ਤੱਕ ਦੋਸ਼ੀ ਨਹੀਂ ਫੜਿਆ ਜਾਂਦਾ, ਸਾਡਾ ਬੇਲੋੜਾ ਉਲਝਣਾ ਉਨ੍ਹਾਂ ਦੀ ਜਿੱਤ ਸਾਬਤ ਹੁੰਦਾ ਹੈ।
ਅਸਲ ਬੇਅਦਬੀ ਤਦ ਹੁੰਦੀ ਹੈ ਜਦੋਂ ਅਸੀਂ ਗੁਰਬਾਣੀ ਦੀਆਂ ਸਿੱਖਿਆਵਾਂ ਨੂੰ ਆਪਣੇ ਅਮਲੀ ਜੀਵਨ ਵਿੱਚੋਂ ਵਿਸਾਰ ਦਿੰਦੇ ਹਾਂ। ਅਪਰਾਧੀ ਚਾਹੁੰਦੇ ਹਨ ਕਿ ਸਿੱਖ ਕੌਮ "ਸ਼ਬਦ" ਦੇ ਗਿਆਨ ਨਾਲ ਜੁੜਨ ਦੀ ਬਜਾਏ ਸਿਰਫ਼ ਜਜ਼ਬਾਤੀ ਲੜਾਈਆਂ ਵਿੱਚ ਉਲਝੀ ਰਹੇ। ਸਾਨੂੰ ਚਾਹੀਦਾ ਹੈ ਕਿ ਅਸੀਂ ਅਦਬ-ਸਤਿਕਾਰ ਵੀ ਕਾਇਮ ਰੱਖੀਏ, ਪਰ ਨਾਲ ਹੀ ਆਪਣੀ ਸੂਝ-ਬੂਝ ਦਾ ਸਬੂਤ ਦਿੰਦੇ ਹੋਏ ਕਾਨੂੰਨ 'ਤੇ ਦਬਾਅ ਬਣਾਈਏ ਕਿ ਦੋਸ਼ੀਆਂ ਨੂੰ ਤੁਰੰਤ ਫੜਿਆ ਜਾਵੇ।ਸਾਨੂੰ ਭਾਵੁਕਤਾ ਦੇ ਵਹਿਣ ਵਿੱਚ ਵਹਿਣ ਦੀ ਬਜਾਏ ਠੰਢੇ ਦਿਮਾਗ ਨਾਲ ਸੋਚਣਾ ਪਵੇਗਾ। ਸੜਕਾਂ ਜਾਮ ਕਰਨੀਆਂ ਜਾਂ ਮੀਡੀਆ ਵਿੱਚ ਇਸਦਾ ਹੇਜ ਜਤਾਉਣਾ ਹੱਲ ਨਹੀਂ ਹੈ। ਸਾਨੂੰ ਗੁਰਬਾਣੀ ਦੇ ਲੜ ਲੱਗ ਕੇ ਆਪਣੀ ਬੌਧਿਕ ਅਤੇ ਸਿਧਾਂਤਕ ਸ਼ਕਤੀ ਨੂੰ ਵਧਾਉਣਾ ਚਾਹੀਦਾ ਹੈ ਤਾਂ ਜੋ ਕੋਈ ਵੀ ਸਾਜ਼ਿਸ਼ ਸਾਨੂੰ ਆਪਣੇ ਮਾਰਗ ਤੋਂ ਭਟਕਾ ਨਾ ਸਕੇ। ਅਪਰਾਧੀਆਂ ਨੂੰ ਸਭ ਤੋਂ ਵੱਡੀ ਹਾਰ ਤਦ ਮਿਲੇਗੀ ਜਦੋਂ ਉਨ੍ਹਾਂ ਦੀਆਂ ਅਜਿਹੀਆਂ ਹਰਕਤਾਂ ਸਾਨੂੰ ਉਲਝਾਉਣ ਵਿੱਚ ਅਸਫਲ ਰਹਿਣਗੀਆਂ ਤੇ ਅਸੀਂ ਸਤਿਗੁਰੂ ਦੇ ਦਰਸਾਏ ਮਾਰਗ ਵਲ ਵਧਾਂਗੇ।
ਜਦੋਂ ਕੌਮ ਨਿਰੰਤਰ ਅਜਿਹੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰ ਰਹੀ ਹੋਵੇ, ਤਾਂ ਸਰਵਉੱਚ ਸੰਸਥਾ 'ਸ੍ਰੀ ਅਕਾਲ ਤਖ਼ਤ ਸਾਹਿਬ' ਦੀ ਭੂਮਿਕਾ ਸਭ ਤੋਂ ਅਹਿਮ ਹੋ ਜਾਂਦੀ ਹੈ। ਜਥੇਦਾਰ ਨੂੰ ਇਸ ਬਾਰੇ ਨੁਮਾਇੰਦਾ ਇਕਠ ਸਦਣਾ ਚਾਹੀਦਾ ਹੈ।ਇਸ ਇਕੱਠ ਵਿੱਚ ਇਹ ਵਿਚਾਰਿਆ ਜਾਵੇ ਕਿ ਭਵਿੱਖ ਵਿੱਚ ਅਜਿਹੀਆਂ ਸਾਜ਼ਿਸ਼ਾਂ ਨੂੰ ਸਿਰ ਚੁੱਕਣ ਤੋਂ ਕਿਵੇਂ ਰੋਕਣਾ ਹੈ ਤੇ ਮੀਡੀਆ ਵਿਚ ਬੇਅਦਬੀ ਦੀ ਖ਼ਬਰ ਬਣਨ ਤੋਂ ਰੋਕਣਾ ਹੈ।ਅਜਿਹੇ ਇਕੱਠ ਨਾਲ ਆਮ ਸਿੱਖ ਸੰਗਤ ਵਿੱਚ ਇਹ ਵਿਸ਼ਵਾਸ ਬਹਾਲ ਹੁੰਦਾ ਹੈ ਕਿ ਕੌਮ ਦੀ ਲੀਡਰਸ਼ਿਪ ਜਾਗਰੂਕ ਹੈ ਅਤੇ ਉਹਨਾਂ ਦੇ ਜਜ਼ਬਾਤਾਂ ਦੀ ਰਾਖੀ ਕਰਨ ਦੇ ਸਮਰੱਥ ਹੈ।
ਦੀਵਾਲੀ ,ਵਿਸਾਖੀ ਉਪਰ ਸਰਬਤ ਖਾਲਸਾ ਸਜਣ ਦੀ ਪਰੰਪਰਾ ਬਹਾਲ ਕੀਤੀ ਜਾਵੇ ਤਾਂ ਜੋ ਸਿਖ ਪੰਥ ਦੀਆਂ ਸਮਸਿਆਵਾਂ ਤੇ ਭਵਿੱਖ ਬਾਰੇ ਨੀਤੀਆਂ ਤੈਅ ਕੀਤੀਆਂ ਜਾਣ।
ਗੁਰਮਤੇ ਕੀ ਹੋਣ
ਸਰਕਾਰਾਂ 'ਤੇ ਨਿਰਭਰ ਰਹਿਣ ਦੀ ਬਜਾਏ, ਹਰ ਪਿੰਡ ਅਤੇ ਇਲਾਕੇ ਦੀਆਂ ਗੁਰਦੁਆਰਾ ਕਮੇਟੀਆਂ ਨੂੰ ਹਦਾਇਤ ਹੋਵੇ ਕਿ ਉਹ ਆਪਣੀ 'ਪਹਿਰਾ ਪ੍ਰਣਾਲੀ' ਮਜ਼ਬੂਤ ਕੀਤਾ ਜਾਵੇ ਅਤੇ ਸੀਸੀਟੀਵੀ (CCTV) ਵਰਗੇ ਤਕਨੀਕੀ ਸਾਧਨਾਂ ਨੂੰ ਲਾਜ਼ਮੀ ਬਣਾਇਆ ਜਾਵੇ।
ਸੰਗਤ ਨੂੰ ਇਹ ਹਦਾਇਤ ਕੀਤੀ ਜਾਵੇ ਕਿ ਘਟਨਾ ਵਾਪਰਨ 'ਤੇ ਭੜਕਣ ਦੀ ਬਜਾਏ, ਤੁਰੰਤ ਸਬੂਤਾਂ ਨੂੰ ਸੰਭਾਲਿਆ ਜਾਵੇ ਅਤੇ ਕਾਨੂੰਨੀ ਪ੍ਰਕਿਰਿਆ ਨੂੰ ਤੇਜ਼ ਕਰਨ ਲਈ ਇਕਜੁੱਟ ਹੋ ਕੇ ਦਬਾਅ ਪਾਇਆ ਜਾਵੇ। ਮੀਡੀਆ ਵਿਚ ਜਾਣ ਤੋਂ ਪਰਹੇਜ਼ ਕੀਤਾ ਜਾਵੇ।
ਪੰਥਕ ਜਥੇਬੰਦੀਆਂ ਨੂੰ ਹਦਾਇਤ ਹੋਵੇ ਕਿ ਬੇਅਦਬੀ ਦੀਆਂ ਤਸਵੀਰਾਂ ਜਾਂ ਵੀਡੀਓਜ਼ ਨੂੰ ਵਾਰ-ਵਾਰ ਨਸ਼ਰ ਕਰਕੇ ਨਕਾਰਾਤਮਕਤਾ ਨਾ ਫੈਲਾਈ ਜਾਵੇ, ਸਗੋਂ ਦੋਸ਼ੀਆਂ ਦੇ ਫੜੇ ਜਾਣ ਤੱਕ ਪਿੱਛਾ ਕਰਨ ਦੀ ਰਣਨੀਤੀ ਬਣਾਈ ਜਾਵੇ।
ਅਪਰਾਧੀਆਂ ਦਾ ਮਕਸਦ ਸਿਖਾਂ ਨੂੰ ਗੁਰਬਾਣੀ ਤੋਂ ਦੂਰ ਕਰਨਾ ਹੈ। ਅਕਾਲ ਤਖ਼ਤ ਵਲੋਂ ਹਦਾਇਤ ਹੋਵੇ ਸਿਖ ਘਰ-ਘਰ ਗੁਰਬਾਣੀ ਪੜ੍ਹਨ ਅਤੇ ਸਮਝਣ ਦੀ ਲਹਿਰ ਚਲਾਉਣ ਦੀ ਹਦਾਇਤ ਕਰਨ ਤਾਂ ਜੋ ਕੌਮ ਅੰਦਰੂਨੀ ਤੌਰ 'ਤੇ ਮਜ਼ਬੂਤ ਹੋਵੇ।